Egunero egiten dudan bezala, gaur ere 04 autobusa hartu dut Donostiako Antigua auzotik lanetik etxera bueltatzeko. Eguerdiko 13:10 minutu inguruan autobusa Errenteriako Kaputxinoseko biribilgunera iritsi denean, errepidearen zubiaren gainean, pankarta bat erdi jarrita ikusi dut. Bertan oraindik zati bat eskegita zegoen, guztiz ondo jarri gabe. Ikusten zen zatian, berriz, "Freedom for the Basque Country" ageri zen. Pankartaren ondoan bi ertzainek hiru gazte atxikita zituzten galdeketa egiten. Nire barnera zera pentsatu dut, horra hor lanbideagatik diskriminatu nahi ez ditugun bi "langile" beren lana duintasunez egiten. Gure segurtasuna babesteko neurriak hartzen, noski.
Autobusak aurrera jarraitu du eta Iztietako geltokia pasa eta gero Niessen Merkataritza Gunearen aurrean dagoen semaforoan geratu da momentu bat. Kasualitatez, bertan geldirik egon den denbora horretan, Merkataritza Gunearen aurrean dagoen pantaila erraldoian, beste iragarkien artean, aukera eduki dut iragarki hau ikusteko "es nuestro momento, a por la segunda estrella, vamos España". Oraingo honetan burura etorri zaizkit, azken aste hauetan, Munduko Futbol Txapelketaren harira, telebistaren eta sare sozialen bitartez etxeko sukalderaino iristen ari zaizkigun iragarki guztiak Espainiaren proiektu politikoa indartzeko eta sendotzeko, futbolaren aitzakia erabiliz. Ez hori bakarrik. Espainiako Futbol Federazioak zenbait enpresa pribaturekin eraiki dituzten publizitate kanpainak oso ondo antolatuta daude Espainiako "proiektu autonomiko-plurinazional" hori normalizatzeko. Atentzioa eman dit bereziki Movistar enpresak kaleratu duen Batido izeneko kanpainak. Bertan, bost jokalari erreferentzialek parte hartzen dute. Horietatik, arbaso etorkinak dituena lehen lerroan jarri dute espainola izateko modu berria azpimarratuta eta gero euskalduna ipini dute arraunean, galegoa mendiak eskalatzen, katalana sokatik tiraka eta madrildarra hartz baten gainean. Hori bai, dena oso modernoa, grabaketa Adimen Artifizialaren laguntzarekin egina dagoelako. Gainera, konturatu naiz hemengo jokalariak, hemengo komunikabideekin elkarrizketak egiten dituenean, oso ondo saltzen duela bere parte-hartzea Espainiako selekzioarekin, bereziki Gipuzkoako bere klubari erakusten dion maitasuna azpimarratuta eta klub horretan jokatzeak eman dion aukera Mundial honetan parte hartzeko. Gero, gainera, bide hori oso eraginkorra eta erosoa da Gipuzkoako klubeko jarraitzaileek Espainiako elastikoa soinean eramateko jokalariaren izena atzealdean jarrita.
Munduko Futbol Txapelketa agerian uzten ari da Espainiako proiektu autonomiko-plurinazionala poliki-poliki eta normaltasun osoz inposatzen ari direla, sistemako euskal alderdi politikoek asimilazioaren bidetik amore emanda
Semaforoa berde jarri denean autobusak berriro martxa hartu du eta berehala iritsi naiz Zumardiko geltokira, nire autobus bidaiaren helmugara. Bertan jaitsi ondoren etxera iristeko Herriko Enparantzatik pasatu naiz. Bertatik askotan ibiltzen naiz, baina, gaur, ibilbide gorabeheratsu honetan, hausnarketarako parada eman dit. Eraikinaren aurrealdean gora begiratu dut eta bertan ikusi dut erdi-erdian Espainiako bandera, aldamenean ikurrina eta herriko bandera dituelarik. Niessen Merkataritza Guneko Espainiako iragarki puntual horrek harrabotsa sortu badu herrian, konturatu naiz Espainiako banderak hamabi urte baino gehiago daramala udaletxeko balkoitik zintzilikatuta. Kasu horretan, gainera, ez da publizitate iragarki sinple bat. Ez da Voxek edo PPk jarri duten bandera ere. Herriko ordezkari politikoen erabakia izan da. Espainiako legearen inposaketaren aurrean Osoko Bilkurak men egitearen ondorioa izan da. Gero, gainera, harrez gero, udaletxeko argazki horrek erakusten duen inposaketa eta menpekotasuna normalizatzen joan dira eta irudi sinboliko eta kultural hori ohikoa bihurtu da Herriko Enparantzan. Herri mailako egoera politiko horrek kezka sortzen badu ere, gauzak gehiago okertzen dira Madrileko Gorteetan ordezkaritza duten euskal alderdi politikoek daramaten ildoa azpimarratzen badugu. Azken urte hauetan, ohikoak dira Espainia autonomiko-plurinazionalaren aldeko mezuak eskumari eta faxismoari aurre egiteko aitzakia erabilita. Hau da, Euskal Herriari begirako estrategia soziala eta nazionala finkatu ordez, Espainiaren proiektu autonomiko-plurinazional hori sendotzeko begirada indartzen ari da inongo konplexurik gabe.
Etxeko portaleko atea irekitzen ari nintzela etorri zait burura gauzak ez direla kasualitatez gertatzen. Bereziki gurea bezalako herri txiki eta kolonizatu batean gertatzen diren gauzak. Gainera, testuinguru horretan, orain Munduko Futbol Txapelketa agerian uzten ari da Espainiako proiektu autonomiko-plurinazional hori poliki-poliki eta normaltasun osoz inposatzen ari direla, sistemako euskal alderdi politikoek asimilazioaren bidetik amore emanda. Hau da, nolako zura halako ezpala.
Eusebio Lasa Altuna
